Gəncənin müxtəlif ərazilərində elektrik təchizatı ilə bağlı şikayətlər səngimək bilmir.
Gencexeber.az-a daxil olan çoxsaylı şikayətlərdə bildirilib ki, şəhər sakinləri hər gün işıqların sönməsi və bərpasının uzun zaman alması ilə üzləşirlər. Onların sözlərinə görə, fasilələr bəzən günlərlə davam edir. Bu vəziyyət isə gündəlik həyatlarına ciddi təsir göstərir. Həmçinin problemlə bağlı aidiyyəti qurumlara edilən müraciətlərə olduqca gec reaksiya verilir.
“Günorta işıqlar olmur, 3-4 saat sonra verilir, gecə yarısı yenə sönür”, – deyə Səməd Vurğun küçəsinin sakini bildirib. Digər şikayətçi isə “Azərişıq” ASC-nin qaynar xəttinə son 3 gün ərazində iki dəfə müraciət etdiyini, lakin hər dəfə yalnız “briqada yaxınlaşır” cavabını aldığını qeyd edib.
Sakinlər artıq kütləvi hal aldığı bu problemin köklü şəkildə həll olunmasını arzu edirlər. Onların fikrincə, Gəncə kimi böyük bir şəhərdə bu cür uzunmüddətli elektrik kəsintiləri qəbuledilməzdir.
