Gəncədə ictimai sanitar qovşaq problemi getdikcə daha çox insanın narazılığına səbəb olur.
Vətəndaşlar tərəfindən Gencexeber.az-a daxil olan çoxsaylı şikayətlərə görə, əsas küçələrdə və parkların ətrafında tualetlər ya heç yoxdur, ya da olanlar uzun müddətdir təmir olunmur, eləcə də qapalıdırlar.
Sakinlərdən biri redaksiyamıza danışarkən deyib: "Bir dəfə uşaqları parka aparmışdım, məcbur olub kafe axtardıq ki, balalarım təbii ehtiyaclarını ödəsinlər. Gəncə kimi şəhərdə belə problemlə üzləşmək ayıbdır. Turist gəlsə nə etsin?"
Müşahidələrə görə, mövcud tualetlərin bir çoxu köhnə və baxımsızdır. Su və işıq təchizatı isə bərbad vəziyyətdədir. Vətəndaşlar aidiyyəti qurumlara səslənərək şəhərdə yeni sanitar qovşaqlarının tikilməsini, mövcud olanların isə təmir olunaraq daim açıq saxlanmasını tələb edirlər.
