Gəncənin Dədə Qorqud küçəsində yaşayan sakinlər yeni asfalt örtüyündən razı qalmayıb.
Şikayətçilərin Gencexeber.az-a bildirdiyinə görə, 32 binanı əhatə edən həyətlərdə aparılan asfaltlama işləri natamam və keyfiyyətsiz şəkildə həyata keçirilib. Bəzi binaların giriş hissələri tam asfaltlansa da, digərlərində vəziyyət olduğu kimi qalıb. Nəticədə yağış yağan zaman sular zirzəmilərə dolur, blokların dəhlizlərində iri gölməçələr yaranır.
Sakinlər iddia edirlər ki, bəzi yerlərdə asfaltı öz şəxsi vəsaitləri hesabına çəkdiriblər. Amma bu da ümumi problemi tam həll etmir.
Məsələ ilə bağlı işləri həyata keçirən podratçı şirkətin nümayəndələri bildiriblər ki, onlara verilən tapşırıq çərçivəsində işlərini tamamlayıblar və əlavə tədbirlər görmək onların səlahiyyətində deyil.
Ərazi sakinləri məsələ ilə bağlı müvafiq addımların atılmasını tələb edirlər.
