Gəncə "İmamzadə ziyarətgah" kompleksində və bu istiqamətdəki yollarda MKTİB tərəfindən genişmiqyaslı təmizlik işləri həyata keçirilib.
Gencexeber.az-a daxil olan məlumata əsasən, İslam dünyasının müqəddəs aylarından biri olan Məhərrəm ayında Gəncənin "İmamzadə ziyarətgah" kompleksinə gələn sakinlərin və şəhərimizin qonaqlarının rahatlığının təmin edilməsi məqsədilə şəhər Mənzil Kommunal Təsərrüfatı İstehsalat Birliyinin canlı qüvvəsi və texnikaları vasitəsilə təmizlik işləri görülüb.
Belə ki, "İmamzadə ziyarətgah" kompleksinin daxili və ətraf əraziləri qurumun texnikaları vasitəsilə təzyiqli su ilə yuyularaq təmizlənib. Ziyarətgahın ərazisində mövcud olan fəvvarədə təmir işləri görülüb. Kompleksin ərazisi və ziyarətgaha aparan yollar məişət tullantılarından, alaq otlarından və toz-torpaqdan təmizlənib, yaşıllıq massivlərinə aqrotexniki qulluq göstərilib, suvarılması təmin edilib.
Yol boyu mövcud olan zibil qutuları, konteynerlər boşaldılıb və təzyiqli su ilə yuyulub. Bundan başqa sözügedən məkanda daş, qum, torpaq qalıqları, xəzəl və məişət tullantıları yığılaraq ərazidən daşınması təmin edilib.
Qeyd edək ki, Gəncənin "İmamzadə ziyarətgah" kompleksi Məhərrəm ayı ərzində müsəlmanlar tərəfindən ən çox ziyarət edilən ibadət ocaqlarından biri sayılır.
