Gəncədə Azərbaycan folklorunun əfsanəvi siması olan Dədə Qorquda həsr edilmiş abidə guşəsi uzun müddətdir baxımsız vəziyyətdədir.
Gencexeber.az-a daxil olan şikayətlərə əsasən, Nəriman Nərimanov prospektində, yolayrıcında yerləşən abidə guşəsində bir sıra problemlər müşahidə olunur. Ərazidə illərdir ki, işıqlandırma sistemi fəaliyyət göstərmir. Axşam saatlarında bu hissə tamamilə qaranlığa qərq olur. Bu isə həm piyadalar, həm də sürücülər üçün təhlükə yaradır, eyni zamanda, abidənin ümumi görünüşünə mənfi təsir göstərir.
Daha bir problem isə abidə daxilində olan Dədə Qorqud bulağı ilə bağlıdır. Şikayətə əsasən, artıq dörd ildən çoxdur ki, bulağa su verilmir və kranlar da sökülüb.
Vətəndaşlar aidiyyəti qurumlardan həm işıqlandırma sisteminin yenidən işə salınmasını, həm də bulağın əvvəlki vəziyyətinə qaytarılmasını tələb edirlər.
