Gəncənin Dadaş Bünyadzadə küçəsinin sakinləri küçələrində işıqlandırma sisteminin işləməməsindən narazılıq edirlər.
Gencexeber.az-a daxil olan çoxsaylı şikayətlərə əsasən, sakinlər uzun müddətdir yalnız bu küçədə axşam saatlarında işıqlandırma sisteminin işləməməsindən əziyyət çəkirlər. Onların sözlərinə görə, ətrafdakı heç bir küçədə sözügedən hal müşahidə edilmir.
Sakinlər dəfələrlə aidiyyəti qurumlara müraciət etdiklərini, lakin heç bir nəticə əldə olunmadığını iddia edirlər. Qeyd edilib ki, xüsusilə axşam saatlarında uşaqların küçəyə çıxması təhlükəli hal alır: “Uşaqlar gecə bayıra çıxanda göz-gözü görmür. Hər an qəza, yıxılma və digər xoşagəlməz hadisələr baş verə bilər”.
Küçə sakinləri problemin tezliklə aradan qaldırılmasını arzu edir və məsul qurumlardan məsələyə biganə qalmamağı xahiş edirlər.
