Gəncə şəhərinin Nizami Gəncəvi prospekti ilə Dədə Qorqud küçəsinin kəsişməsində nəqliyyatın hərəkətində ciddi çətinlik yaşanır.
Gencexeber.az-a sakinlər tərəfindən edilən şikayətlərə əsasən, burada 11 və 20 nömrəli marşrut avtobusları “Posyolka” istiqamətinə doğru sol tərəfdə – yəni əks istiqamətdə hərəkət edir. Bu hissə xüsusi olaraq avtobusların istifadəsi üçün nəzərdə tutulsa da, aidiyyəti nişanların olmaması səbəbindən sürücülər burada nəqliyyat vasitələrini saxlayır. Nəticədə ərazidə tez-tez tıxac yaranır.
Əlavə olaraq, Göygöl rayonu istiqamətinə sarnişindaşıma ilə məşğul olan taksilər avtobus dayanacağının qarşısını kəsərək iriqabaritli nəqliyyat vasitələrinin yola çıxışını çətinləşdirir, eyni zamanda iki marşrut xəttinə aid avtobusların dayanacaqdan istifadə etməsinə mane olur.
Sakinlər bildirir ki, problemin kökündə lazımi yol nişanlarının qoyulmaması dayanır. Onların sözlərinə görə, əgər burada “Dayanmaq qadağandır” və “Avtobus zolağı” nişanları yerləşdirilərsə, həm tıxacların qarşısı alınar, həm də sərnişinlərin təhlükəsizliyi təmin edilər.
Şikayətçilər aidiyyəti qurumlardan məsələyə operativ şəkildə müdaxilə edilməsini və problemi həll etmək üçün tədbir görülməsini xahiş edirlər.
