Gəncədə avtomobil yolunda çökmə təhlükəsi yaranıb.
Gencexeber.az-ın məlumatına görə, Gəncə Avtomobil Zavodunun yaxınlığında yerləşən, nəqliyyatın intensiv hərəkət etdiyi Cümhuriyyət və Fərman İmamquliyev küçələrinin kəsişməsində asfalt örtüyündə yaranan çuxur getdikcə böyüyür.
Sözügedən yolda səthin altında boşluq əmələ gəlib və yağış suları həmin boşluğa axaraq asfaltı daha da zədələyir. Ərazidən istifadə edən sürücülər və sakinlər vəziyyətin təhlükəli hal aldığını bildirirlər.
“Asfaltda çuxur 3 gün əvvəl balaca idi, hər gün daha da böyüyür,” – deyə ərazidə yaşayan sakin qeyd edib.
Yerli sakinlər və sürücülər məsul qurumlardan təcili tədbir görülməsini və yolda çökmə baş vermədən problemin aradan qaldırılmasını tələb edirlər.
