Gəncədə qurumuş sərv ağacı hələ də kəsilməyib.
Gencexeber.az-ın məlumatına görə, Gəncə şəhəri Nizami bələdiyyəsinə Əli Nəzmi küçəsi, ev 64 ünvanında yol kənarında yerləşən sərv ağacının quruması ilə bağlı müraciət olunub. Bildirilib ki, ağac artıq bioloji inkişafdan dayanıb və kəsilməlidir.
Qurum tərəfindən aparılan baxış zamanı 16 metr hündürlüyü olan ağacın heç bir xarici müdaxilə olmadan tam şəkildə quruduğu təsdiqlənib. Buna baxmayaraq, yerli sakinlərin dəfələrlə etdiyi müraciətlərə rəğmən, qurumuş ağac bu günə qədər kəsilməyib.
Nəticədə, bu vəziyyət həm ətraf ərazilərdə yaşayanlar, həm də hərəkətdə olan vətəndaşlar üçün potensial təhlükə mənbəyi olaraq qalır. Sakinlər məsələ ilə bağlı aidiyyəti qurumlardan təcili tədbir görülməsini tələb edirlər.
Bundan başqa Vaqif küçəsi, ev 115-in qarşısında iri ağac parçası günlərdir ərazidən yığışdırılmır. Vətəndaşların sözlərinə görə, hər gün Gəncə şəhər Mənzil Kommunal Təsərrüfatı İstehsalat Birliyinin (MKTİB) müvafiq şöbələri tərəfindən zibil qutuları boşaldılsa da, sözügedən qurumuş ağac hələ də oradadır.
