Gəncədə ağacın təhlükə saçan budağı hələ də kəsilməyib.
Gencexeber.az-a daxil olan şikayətə əsasən, Gəncə şəhəri, 20 Yanvar küçəsində iri gövdəli ağacın budağı qırılaraq yaşayış evinin hasarına düşüb. Budaq hazırda sallanmış vəziyyətdə qalıb və ətraf əhali üçün ciddi təhlükə mənbəyinə çevrilib.
Sakinlər bildirir ki, hadisə təxminən bir həftə öncə baş versə də, problem hələ də aradan qaldırılmayıb. Onların sözlərinə görə, məsələ ilə bağlı əvvəlcə şəhərin Yaşıllaşdırma İdarəsinə müraciət ediblər. Lakin idarə əməkdaşları onları Gəncə Şəhər İcra Hakimiyyətinə yönləndirib.
İcra Hakimiyyətindən iki nəfər əraziyə gələrək vəziyyətlə tanış olub. Buna baxmayaraq, indiyədək heç bir praktiki tədbir görülməyib.
Sakinlər aidiyyəti qurumlardan təhlükənin tez bir zamanda aradan qaldırılmasını tələb edirlər.
