Gəncə şəhərinin Adilxan Ziyadxanov küçəsi, 36-cı binanın qarşısında vəziyyət ürəkaçan deyil.
Gencexeber.az məlumat verir ki, “Azərişıq” ASC tərəfindən həyata keçirilən qazıntı işləri nəticəsində əvvəlcə normal vəziyyətdə olan küçə tamamilə yararsız hala salınıb. Sakinlərin sözlərinə görə, əraziyə çınqıl tökülmüş və hərəkət üçün əlverişli idi. Lakin ASC əməkdaşları gəlib ərazini qazaraq dağıdıb və heç bir şəkildə əvvəlki vəziyyətinə qaytarmadan oranı tərk edib.
Artıq iki aydan çoxdur ki, bu vəziyyət davam edir. Son günlərdə isə "bərpa işləri" adı ilə bir neçə işçi gəlsə də, nəticə dəyişməyib — bina qarşısında hələ də qum topaları qalıb. Odur ki, yağış yağanda ərazi palçıq içində batır. Avtomobillər həyətə daxil olarkən az qala çuxurlarda ilişib qalır.
Sakinlər vəziyyətdən narazıdır və bildirirlər ki, qazıntı işlərini aparan qurum sözügedən ərazidə məsuliyyətsizlik nümayiş etdirib. Yaşayış ərazisinin bu cür vəziyyətdə qoyulması qəbuledilməzdir.
Onlar aidiyyəti qurumdan məsələyə dərhal müdaxilə etməsini tələb edirlər.
