Gəncəçayın məcrası boyu təmizlik aksiyası keçirilib.
Gencexeber.az-a Mənzil Kommunal Təsərrüfatı İstehsalat Birliyindən (MKTİB) verilən məlumata görə, qurumun Ərazi Xidmət Sahələrinin əməkdaşları tərəfindən aparılan təmizlik işləri çayın məcrasında, körpülərin alt hissəsində və çayın ətraf ərazilərində görülüb. Çayın daxili hissəsində və ətrafından yığılan məişət tullantıları, ağac qırıntıları, kol-kos və alaq otları bir yerə toplanaraq ərazidən daşınması təmin edilib. Bundan başqa çayın sağ və sol sahilində mövcud zibil qutularının ətrafında səliqə-sahman yaradılıb.
MKTİB tərəfindən Gəncəçayın ətrafında yaşayan və fəaliyyət göstərən sakinlərdən, iaşə obyektləri, restoran və kafe sahiblərindən bir daha xahiş edilib ki, şəhərimizin təmizliyinin qorunub saxlanılmasına dəstək nümayiş etdirərək, məişət tullantılarını çayın ərazisinə deyil, bunun üçün təyin olunmuş konteynerlərə və ya zibil qutularına atsınlar. Əks təqdirdə anitisanitar vəziyyətə şərait yaradanlar aşkar olunaraq, inzibati qaydada məsuliyyətə cəlb olunacaqlar.
