Gəncəçay yenidən çirklənmə problemi ilə gündəmə gəlib.
Gencexeber.az-a daxil olan məlumata görə, çayın şəhər ərazisindən keçən hissəsində vəziyyət ürəkaçan deyil. Sakin tərəfindən redaksiyamıza göndərilən videogörüntülərdə çay məcrasında toplanan məişət və müxtəlif mənşəli tullantılar açıq şəkildə görünür.
Plastik qablar, torbalar və digər zibillərlə dolu Gəncəçay çirkab anbarını xatırladır. Mütəmadi xəbərdarlıqlara və ara-sıra tətbiq olunan cərimələrə baxmayaraq, problem hələ də öz həllini tapmayıb.
Ekoloji vəziyyətdən narahat olan sakinlər aidiyyəti qurumlardan təcili tədbirlər görülməsini tələb edirlər. Onların sözlərinə görə, bu mənzərə Gəncənin adına yaraşmır və çayın “boğulması” gələcək fəsadlara yol aça bilər.
