Gəncə şəhərində aparılan genişmiqyaslı tikinti-quruculuq və abadlıq işləri davam edir. Xəbər verdiyimiz kimi, ötən gün Prezident İlham Əliyev və birinci xanım Mehriban Əliyeva şəhərdə yeni layihələrlə tanış olublar. Bu gün isə media nümayəndələri üçün xüsusi tur təşkil olunub.
Stadion müasir standartlara uyğun tikilir
Gənclər və İdman Nazirliyinin şöbə müdiri Elmir Mehdiyev Gencexeber.az-a bildirib ki, Gəncə şəhər stadionu müasir standartlar əsasında yenidən inşa edilir. Prezident İlham Əliyevin 2023-cü ildə imzaladığı sərəncama əsasən, stadionun layihələndirilməsi və tikintisi üçün Prezidentin ehtiyat fondundan ilkin olaraq 1 milyon manat ayrılıb.
Stadionun ərazisi genişləndirilərək 10,4 hektara çatdırılıb, köməkçi məşq meydançaları və Futbol Akademiyası üçün bina tikilib. Arenanın ümumi sahəsi parklanma zonaları ilə birlikdə 12 hektardan çox olacaq. Burada fiziki məhdudiyyətli tamaşaçılar üçün xüsusi yerlər, media və VIP zonalar, futbolçular üçün soyunma, konfrans və tibbi otaqlar da yaradılır. Yeni stadion 2025-ci ilin sentyabr-oktyabr aylarında baş tutacaq Azərbaycan III MDB Oyunlarına ev sahibliyi edəcək.
“Azerbazalt” zavodu – yeni istehsal gücü
Gəncədə əsası qoyulan “Azerbazalt” MMC-nin bazalt məhsulları zavodunda ildə 360 min ton orqanik gübrə istehsal ediləcək. Layihənin birinci mərhələsinin investisiya dəyəri 27 milyon manat təşkil edir.
Müəssisə İsveç və Türkiyə texnologiyaları əsasında qurulacaq və Göygöl rayonunun “Çaykənd” yatağından çıxarılan keyfiyyətli bazalt xammal kimi istifadə olunacaq. Zavodda 200 nəfərin daimi işlə təmin edilməsi nəzərdə tutulur.
Memorial Kompleks – Gəncənin xatirə məkanı
Dövlət Şəhərsalma və Arxitektura Komitəsinin şöbə müdiri Ramil Cahangirov isə bildirib ki, Prezident İlham Əliyev və birinci xanım Mehriban Əliyeva Gəncə Memorial Kompleksində görülən işlərlə də tanış olublar. 2022-ci ildə əsası qoyulan kompleks 44 günlük Vətən müharibəsində Ermənistanın mülki əhaliyə qarşı törətdiyi cinayətləri özündə əks etdirəcək.
Ümumi sahəsi 4 hektar olan ərazidə ikimərtəbəli muzey binası, sərgi və konfrans zalları inşa olunur. Burada dağıdılmış yaşayış binalarının yerləri, mülki əhaliyə qarşı törədilmiş cinayətləri əks etdirən ekspozisiyalar ziyarətçilərə təqdim ediləcək. Ərazidə 700-ə yaxın ağac, 12 mindən çox dekorativ kol və gül əkilməsi nəzərdə tutulub.
