Gəncədə suyun uzun fasilələrlə verilişi sakinləri təngə gətirib.
Gencexeber.az-a şəhərin müxtəlif ərazilərindən daxil olan şikayətlərə əsasən, sözügedən məsələ aylarla, bəzən isə illərlə davam edir. Sakinlərin bildirdiyinə görə, əvvəllər ərazidə içməli su fasiləsiz verildiyi halda, indi gündə cəmi 3-4 saat verilir ki, bu da onların gündəlik məişət tələbatlarını ödəməyə kifayət etmir.
Zərrabi küçəsində yaşayan şikayətçilərdən biri bildirir ki, dünən axşam saat 18:00 radələrində suyun verilişi dayandırılıb və bu günə qədər hələ də bərpa olunmayıb. Onların sözlərinə görə, bu cür hallarla tez-tez qarşılaşırlar və aidiyyəti qurumlardan məsələ ilə bağlı heç bir izahat verilmir.
Sakinlər cavabdeh strukturlardan problemin operativ şəkildə həll olunmasını və fasiləsiz su təminatı ilə bağlı tədbir görülməsini tələb edirlər.
