Gəncə şəhərinin Nizami Gəncəvi prospekti, 549 ünvanında yaşayan sakinlər ictimai nəqliyyat dayanacağının olmamasından narazılıq edirlər.
Gencexeber.az məlumat verir ki, sakinlər tərəfindən redaksiyamıza bildirildiyinə görə, Heydər Əliyev parkının yaxınlığında, Gəncə İdman Sarayının arxasında yerləşən sözügedən binada yaşayanlar hazırda ərazidə avtobus dayanacağı olmadığı üçün 1 kilometrə yaxın məsafəsini piyada getməli olurlar. Bu isə xüsusilə uşaqlı, yaşlı və əlində yük olan vətəndaşlar üçün ciddi çətinlik yaradır.
"Dayanacağı elə yerə təyin ediblər ki, piyada keçidinə çatmaq üçün xeyli məsafə avtomobil yolunun kənarı ilə getməli oluruq. Ərazidə məktəbə gedən uşaqlar da var. Bu vəziyyət çox təhlükəlidir," – sakinlərdən biri bildirib.
Onların sözlərinə görə, məsələ ilə bağlı Azərbaycan Yerüstü Nəqliyyat Agentliyinə (AYNA) və Gəncə Şəhər İcra Hakimiyyətinə müraciət edilsə də, hələlik heç bir nəticə əldə olunmayıb.
Sakinlər ərazidə yerləşən yanacaqdoldurma məntəqəsinin yanında yeni avtobus dayanacağının quraşdırılmasını təklif edirlər. Onların fikrincə, həmin yer həm yaşayış binasına yaxın, həm də sərnişinlər üçün daha əlverişlidir.
Qeyd edək ki, "BakuBus MMC"nin Gəncə şəhərində fəaliyyətə başlaması ilə əlaqədar ictimai nəqliyyat infrastrukturunda həyata keçirilən dəyişikliklərə əsasən sürücülər yalnız müəyyən olunmuş dayanacaqlarda sərnişin endirmə və ya mindirmə həyata keçirə bilərlər.
