Gəncə şəhərinin müxtəlif əraziləri üzrə mövcud olan konteynerlərə yığılan məişət tullantılarının vaxtı-vaxtında MKTİB-nin Təmizlik şöbəsi tərəfindən ərazidən poliqona gündəlik daşınması təmin edilir.
Bunu Gencexeber.az-a açıqlamasında Mənzil Kommunal Təsərrüfatı İstehsalat Birliyi bildirib.
Əlavə edilib ki, Üzeyir Hacıbəyov, Adil Xan Ziyadxanov, Şəhid Rövşən Qurbanov, Zərrabi, Əziz və Elbrus Nəzərov küçələrində zibilin yığılıb qaldığı, həmçinin üfunətin ətrafa yayılmasına, bir sözlə - şəhər ərazisində antisanitar vəziyyətin ortaya çıxmasına məsuliyyətsiz sakinlər səbəb olur.
“Zibilin məişət tullantıları üçün nəzərdə tutulan konteynerlərin daxilinə deyil ətrafına atılması, vətəndaşların təmir qalıqlarının zibil konteynerlərinin ətrafına atması, bağ və həyətyanı sahələrdən budanan ağac, həmçinin qurumuş kolların sakinlər tərəfindən konteynerlərin ətrafına yığması, zibil konteynerlərinin məsuliyyətsiz sakinlər tərəfindən yerinin dəyişdirilməsi, yandırılması və buna oxşar neqativ hallar küçələrimizin zibillənməsinə, qeyd edildiyi kimi antisanitar vəziyyətin yaranmasına zəmin yaradır” - qurum bildirib.
Habelə, adıçəkilən ünvanlarda MKTİB-nin canlı qüvvəsi və texnikaları vasitəsilə təmizlik işləri həyata keçirilib. Zibil konteynerləri boşaldılıb, ətrafında səliqə-sahman yaradılıb, tullantıların ərazidən daşınması təmin edilib.
Gəncə şəhər Mənzil Kommunal Təsərrüfatı İstehsalat Birliyi əhalidən bir daha xahiş edir ki, məişət tullantılarının daşınması üçün göstərilən xidmətə görə, aylıq ödənişlərini vaxtı-vaxtında etsinlər.
Qeyd edək ki, redaksiyamıza Gəncə şəhərinin bir sıra ərazilərində məişət tullantıları üçün nəzərdə tutulan zibil konteynerlərinin vaxtında boşaldılmaması və daşınmaması ilə bağl çoxsaylı şikayətlər daxil olub.
