Xəbər verdiyimiz kimi, plastik qablar, torbalar və digər zibillərlə dolu Gəncəçay çirkab anbarını xatırladır. Mütəmadi xəbərdarlıqlara və ara-sıra tətbiq olunan cərimələrə baxmayaraq, problem hələ də öz həllini tapmayıb.
Gencexeber.az-a Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən verilən açıqlamada bildirib ki, qurumun əməkdaşları həftədə ən azı 1 dəfə olmaqla Gəncəçayının məcrasında və ətrafında təmizlik işləri görürlər.
“Yaxın vaxtlarda isə İDEA İB ilə MKTİB tərəfindən çayın müxtəlif ərazilərində kompleks iməcilik işləri həyata keçirilib. Hər dəfə kifayət qədər tullantı yığılaraq ərazidən daşınması təmin edilir. Lakin çay kənarında yaşayan bəzi sakinlərin, iaşə obyektlərinin sahiblərinin məsuliyyətsiz davranışı nəticəsində, müxtəlif məişət tullantılarının çaya atılması bu çür xoşagəlməz mənzərəni ortaya qoyur” – MKTİB bildirib
Əlavə edilib ki, dəfələrlə MKTİB tərəfindən mediada maarifləndirici çağırışlar, çay ətrafında yaşayan sakinlərlə proflaktik söhbətlər aparılmasına baxmayaraq təəssüf ki, hələdə bu kimi neqativ hallar vətəndaşlarımız tərəfindən təkrarlanmaqdadır. Qurum bir daha şəhərimizin sakinlərinə müraciət edərək bildirib ki, məişət və digər tullantılarını Gəncəçayın məcrasına deyil, tullantılar üçün nəzərdə tutulan konteynerlərə atsınlar.
