Gəncədəki universitetlərin birinin əməkdaşları Naxçıvanda beynəlxalq elmi konfransda iştirak ediblər. Bu haqda 12 iyun tarixində GDU-ya istinadən xəbər veririk.
Elmi konfrans “Biomüxtəlifliyin dayanıqlığının təmin edilməsində yeni çağırışlar (COP29) -Yaşıl dünya və insan sağlamlığı” mövzusunda baş tutub. Burada Gəncə Dövlət Universitetinin əməkdaşları iştirak ediblər. Konfransın açılış mərasimi Babək rayonunun Şıxmahmud kəndində yerləşən Azərbaycan Respublikası Elm və Təhsil Nazirliyi Bioresurslar İnstitutunun (Naxçıvan) Nəbatat bağında olub.
Tədbirdə Azərbaycanda təbii sərvətlərin, eləcə də biomüxtəlifliyin qorunması, yaşıllaşdırma proqramlarının gerçəkləşdirilməsi sahəsində görülən işlər və qarşıda duran vəzifələr barədə çıxışlar dinlənilib. Daha sonra elmi konfransda əməkdaşlarımızın müxtəlif mövzularda məruzələrinə yer verilib.
Qeyd edək ki, konfrans 2 gün ərzində 8 bölmədə elmi məruzələrlə davam edib.
