Gəncədə Fikrət Əmirovun 100 illik yubileyinə həsr edilmiş növbəti tədbir keçirilib. Bu haqda 14 dekabr tarixində Gəncə Dövlət Universitetinə istinadən məlumat veririk.
Tədbir Pedaqoji fakültənin Musiqi fənləri kafedrasının təşkilatçılığı ilə baş tutub. Burada universitetin Tədris məsələləri üzrə prorektoru Şahin Xurşudov, Təcrübə və Karyera şöbəsinin müdiri Cabbar Qarayev, Pedaqoji fakültənin əməkdaşları, tələbələr və Gəncə “SOS” Uşaq Kəndinin bir qrup sakini də iştirak ediblər.
Musiqi fənləri kafedrasının müdiri Sevda Qurbanəliyeva görkəmli bəstəkarın zəngin yaradıcılığından danışıb. Sonra prorektor Şahin Xurşudov universitet rəhbərliyi adından tədbir iştirakçılarına uğurlar arzulayıb, “SOS” Uşaq Kəndinin balaca sakinlərinə isə müxtəlif hədiyyələr təqdim edib.
Tədbirdə universitetin tələbələri və balacalar birlikdə bəstəkar Fikrət Əmirovun mahnılarını səsləndiriblər.
