Gəncə Dövlət Universitetində Kimya-biologiya fakültəsində tədris olunan “Biologiyanın tədrisi metodikası” fənninin dərsində fərqli və maraqlı bir yanaşma həyata keçirilib.
Gencexeber.az məlumat verir ki, Anatomiya, fiziologiya və zoologiya kafedrasının dosenti Günay Sadıqovanın təşkilatçılığı ilə keçirilən dərsdə yalnız elmi biliklər deyil, eyni zamanda Gəncə şəhərinin zəngin tarixi və dahi Azərbaycan şairi Nizami Gəncəvinin yaradıcılığı da tələbələrə təqdim olunub.
Gələcəyin müəllimləri olacaq üçüncü kurs tələbələri dərsin qonaqlarını maraqla qarşılayıblar. Elmlər Akademiyasının Gəncə bölməsinin Humanitar və Ədəbiyyat İnstitutunun direktoru, filologiya üzrə fəlsəfə doktoru Ruziyya Quliyeva Gəncə haqqında verdiyi suallarla tələbələr arasında interaktiv mühit yaradıb. Tələbələr onun suallarına həvəslə cavab verərək müəllifin kitablarını hədiyyə olaraq əldə ediblər.
Tədbirin digər qonağı, Gəncə Dövlət Tarix-Mədəniyyət Qoruğunun Nizami Məqbərə Kompleksi filialının müdiri Gülnarə İsmayılova olub. O, dərs zamanı gətirdiyi video materialları ilə tələbələrin marağına səbəb olub. Görüşdə həmçinin ekskursiya rəhbəri Hüsniyə Rəhimova da iştirak edib.
