Gəncə Dövlət Universitetində toplantı baş tutub. Bu haqda 29 may tarixində GDU-ya istinadən xəbər veririk.
Tədbir 28 May – Müstəqillik gününə həsr olunub. Universitetin rektoru Yusif Yusibov tədbiri giriş sözü ilə açaraq, 1918-ci il mayın 28-də müsəlman Şərqində ilk demokratik parlamentli respublikanın - Azərbaycan Xalq Cümhuriyyətinin elan edilməsinin tarixi hadisə və ölkə dövlətçiliyinin inkişafında şanlı səhifələrdən biri olduğunu, qısa müddət ərzində Cümhuriyyətin dövlət quruculuğu prosesində böyük uğurlar qazandığını bildirib.
Dəyirmi masada universitetin Humanitar məsələlər üzrə prorektoru Gülsüm Fətəliyevanın “Azərbaycanın müstəqilliyini xilas etmiş, əbədiləşdirmiş Lider ”, rektorun baş müşaviri Asif Cavadovun “Azərbaycan Xalq Cümhuriyyətinin yaradılması tarixi hadisə idi”, Sosial fənlər kafedrasının müdiri Cavid Bağırzadənin “Azərbaycan Xalq Cümhuriyyəti – Azərbaycan tarixində ilklər”, Azərbaycan və dünya ədəbiyyatı kafedrasının müdiri Səba Namazovanın “Cümhuriyyət dövrünün ədəbi-mədəni mühitə təsiri”, Ümumi tarix kafedrasının müəllimi Elmira Əliyevanın “Azərbaycanın dövlətçilik tarixində Cümhuriyyətin rolu” mövzusunda məruzələri dinlənilib.
