Gəncədə kanalizasiya xətti partlayıb.
Gencexeber.az məlumat verir ki, İsmət Qayıbov küçəsinin sakinləri kanalizasiya xəttində baş verən iri qəza ilə bağlı bir aydır həyəcan təbili çalır. Belə ki, sözügedən ərazidə bir aydır, demək olar ki, hər gün boru aşıb-daşır. Bu səbəbdən 10-dan çox həyət evinin hamam otaqlarında mövcud traplardan və sanitar qovşaqlarındakı unitazlardan çirkab suları əks istiqamətdə hərəkət edərək ətrafa axır.
Sakinlərin sözlərinə görə, aidiyyəti quruma dəfələrlə bu barədə məlumat verilib. Əməkdaşlar əraziyə gələrək problemin müvəqqəti aradan qaldırılması istiqamətində işlər görüblər. Lakin “çətinlik” kökündən həll edilməyib.
Hazırda İsmət Qayıbov küçəsində avtomobil yolunda kanalizasiya suları uzun məsafəyə axaraq ətrafa pis qoxu yayır. Orada yaşayanlardan bir neçə nəfər xəttin açılması üçün çalışırlar.
Sakinlər aidiyyəti qurumlardan problemin aradan qaldırılması üçün müvafiq addımların atılmasını tələb edirlər.
