“Mən belə düşünürəm ki, sənətçi üçün heç vaxt rolun böyüyü-kiçiyi olmamalıdır. O heç nə seçməməlidir. Elə aktyor və aktrisalar var ki, onların öz sənət prinsipləri, baryerləri var. Yəni qadındırsa həyat yoldaşının, kişidirsə xanımının ona qoyduğu qadağalar var. Bu bizim ailəmizdə də var. Mən nə qədər cəsarətli obrazlar oynasam da, elə bir hədd var ki, onu aşmamalıyam. Bunu birinci gündən mənə həyat yoldaşım deyib…”
Bunu moderator.аz-a açıqlamasında Akademik Musiqili Teatrın aparıcı aktrisası Gültac Əlili deyib.
O, daha sonra teatrda işlərinin çox olmasına baxmayaraq məişət problemlərini də özünün həll etdiyini, ailəsinə böyük qayğı göstərdiyini bildirib. Onun sözlərinə görə, iki azyaşlı övladı da həyat yoldaşı və onunla birgə teatrdakı tamaşalarda rol alır.
Qeyd edək ki, Əlili Gültac Müzəffər qızı 1 iyul 1987-ci ildə Gəncə şəhərində anadan olub. 2009-cu ildə Azərbaycan Dövlət Mədəniyyət və İncəsənət Universitetinin teatr aktyorluğu fakültəsini bitirib.
