Məişət zorakılığı Azərbaycanda geniş yayılmış problemdir. Demək olar əksər ailələrdə məişət zorakılığı özünü müəyyən formalarda büruzə verir. Zorakılıq hallarına susanlar isə az deyil. Çünki bəzən ailə sirrini yaymamaq üçün buna adi hal kimi yanaşılır. Ailə sirrini yaymaq istəməyən biri isə səhəri elə bir faciə qurbanına dönür ki, taleyi ürək dağlayır.
Zorakılıq qurbanı olmağı seçməyən şəxslər də var. Hansı ki, onlar dövlət və ya özəl sığınacaqlara müraciət edir, canlarını qurtarırlar.
Məlum məsələdir ki, məişət zorakılığı hallarına ölkənin bütün şəhər və rayonlarda rast gəlinir.
Bəs bu il Gəncədə zorakılığa susmayan, sığınacağa yerləşdirilən neçə şəxs var?
Bununla bağlı Gencexeber.az-a açıqlama verən Əmək və Əhalinin Sosial Müdafiəsi Nazirliyinin Sosial Xidmətlər Agentliyinin (SXA) mətbuat katibi Murad Həşimov deyib ki, SXA-nın sosial sifarişi ilə “Məişət zorakılığından zərərçəkmiş şəxslər üçün yardım mərkəzlərinin inkişafına dəstək” layihəsi Gəncə şəhərində də həyata keçirilir.
“Layihənin məqsədi məişət zorakılığından zərər çəkmiş şəxslərə sosial-hüquqi xidmətin göstərilməsi, onların sosial reabilitasiyasına dəstək və sözügedən kateqoriyadan olan şəxslərin rifahının yaxşılaşdırılmasıdır. Hazırda məişət zorakılığının qurbanı olan 19 şəxs sözügedən mərkəzdə qeyd edilən xidmətlərdən yararlanır”, - deyə qurum rəsmisi bildirib.
Qeyd edək ki, Gəncədə məişət zorakılığından zərərçəkmiş şəxslər üçün yardım mərkəzi Hüseyn Cavid küçəsi 31 ünvanında yerləşir.
Humay İsgəndərli
