Gəncə sakinlərinin qəzəbinə tuş gələn daha bir məsələ şəhərin fərqli ərazilərində kommunal qəzaların aradan qaldırılması üçün müxtəlif qurumlar tərəfindən aparılan sonsuz qazıntılardır.
Gencexeber.az-a mütəmadi olaraq daxil olan şikayətlərdə bildirilir ki, problemlər həll olunduqdan sonra əmələ gələn iri çuxurlar uzun müddət basdırılmır, yolun örtüyü isə bərpa olunmur.
Təqdim edilən foto və video materiallardan da aydın olur ki, ərazilərdə piyada və avtomobillərin hərəkəti məhdudlaşır. Hava şəraiti yağıntılı olanda isə yağış suları torpağa qarışaraq ətrafı palçığa qərq edir.
Sakinlərin fikrincə, bu problem daha çox kommunal sahədə fəaliyyət göstərən və yolların təmir-tikintisi ilə məşğul olan qurumlar arasında lazımi koordinasiyanın olmaması ilə bağlıdır. Onlar aidiyyəti qurumlardan yolların tez bir zamanda bərpa olunmasını tələb edirlər.
