Gəncədə altı il davam edən kommunal problemi maraqlı üsulla həll etmək istəyiblər.
Gencexeber.az-ın məlumatına görə, Şah İsmayıl Xətai prospektində yerləşən “Meqa Mart” mağazasının qarşısında yenə su və kanalizasiya boruları partlayıb. Həmin yerdə içməli su çirkaba qarışaraq yeni çəkilmiş asfaltın altından fontan vurur.
Sakinlərin sözlərinə görə, burada kommunal qəzalar mütəmadi olaraq altı il boyunca davam edib. Şikayətçilər bildirirlər ki, bir müddət öncə burada asfalt örtüyünün yenilənməsi işəri görülən zaman onlar aidiyyəti qurumun əməkdaşlarına müraciət edərək xahiş ediblər ki, öncə yararsız borular təmir edilsin. İşçilər isə “bu bizə aid olan məsələ deyil, lakin problemi həll edəcəyik” deyərək qəzalı xətlərin üstündən asfaltı çəkiblər.
İki ay keçməmiş isə su qalın asfaltın altından yer səthinə çıxmağa başlayıb. Bu “nadir təbiət hadisəsi”ni hər gün, saat 10:00-12:00 aralığında cədvəl üzrə suyun verilişi zamanı müşahidə etmək mümkündür. Hazırda ərazi palçığa qərq olub, ətrafa üfunət yayılıb.
