Gəncədə Comərd Qəssab türbəsində və abidəyə gedən yolda təmizlik işləri görülüb.
Gencexeber.az bildirir ki, Mənzil Kommunal Təsərrüfatı İstehsalat Birliyi tərəfindən Azərbaycan Bayrağı küçəsində, Comərd Qəssab türbəsinin ətrafında genişmiqyaslı təmizlik işləri həyata keçirilib.
Qurumun canlı qüvvə və texnikaları vasitəsilə adıçəkilən ərazilər məişət və digər tullantılarından, alaq otlarından, kollardan və yol boyu vətəndaşlar tərəfindən ətrafa atılan təmir-tikinti qalıqlarından təmizlənib. Gün ərzində yığılan tullantıların ərazidən daşınması təmin edilib. Comərd Qəssab türbəsinin ətrafında yaşıllıq zolağına aqrotexniki qulluq göstərilib, suvarılması təmin edilib. Ərazidə aparılan monitorinqlər zamanı əhali və sahibkarlıq subyetklərinə məxsus təmir-tikinti qalıqlarının, məişət tullantılarının və torpaq kütləsinin Comərd Qəssab türbəsinə gedən yolun sağ və sol hissəsinə atılması aşkar edilib.
Şəhər Mənzil Kommunal Təsərrüfatı İstehsalat Birliyi ərazidə sanitar qaydaları pozan şəxslərə bir daha xəbərdarlıq edərək bildirib ki, bu kimi şəxslər aşkar olunduğu halda qanunvericiliyə əsasən inzibati qaydada məsuliyyətə cəlb olunacaqlar.
