Gəncədə Konstantin Uşinski küçəsindəki 5 saylı evin qarşısında sakinlər artıq bir həftəyə yaxındır ki, ciddi problemlə üzləşirlər: burada kanalizasiya borusu partlayıb.
Gencexeber.az məlumat verir ki, “Şəfa” aptekinin arxasında yerləşən çoxmənzilli binanın qarşısında çirkab suları yığılıb. Şikayət edən sakinlər bildirirlər ki, aidiyyəti orqana dəfələrlə müraciət etmələrinə baxmayaraq, vəziyyət kritik olaraq qalır - kanalizasiya xətti hələ də təmir olunmayıb.
Hazırda ərazi antisanitar vəziyyətdədir. Açıq kanalizasiyadan ətrafa yayılan üfunət yoldan keçən insanları burunlarını tutmağa məcbur edir. Valideynlər isə uşaqlarını oynamaq üçün həyətə belə buraxa bilmirlər.
Sakinlərin sözlərinə görə, xüsusilə isti havalarda vəziyyət daha da ağırlaşır. Belə ki, günəş şüaları çirkab sularını qızdırır və xoşagəlməz qoxular daha dözülməz olur.
Vətəndaşlar qeyd edilən çətinliyin aradan qaldırılması üçün aidiyyəti qurumlardan hərəkətə keçməyi və tez bir zamanda borunun təmir etmələrini istəyirlər.
