Xəbər verdiyimiz kimi, Gəncədə 20 saylı marşrut xətti üzrə istismara iki yeni avtobus verilib. Bir çox sakinlər Gencexeber.az xəbər portalının sosial şəbəkə hesablarında bu “kiçik” addımların şəhərin ümumi ictimai nəqliyyat probleminin acınacaqlı vəziyyətini yaxşılaşdırmaq üçün kifayət etməməsinə dair müxtəlif fikirlər səsləndiriblər.
Gencexeber.az məlumat verir ki, Gəncə Şəhər İcra Hakimiyyətinin mətbuat xidməti tənqidi şərhlərə reaksiya verib. Qurum sakinlərə ictimai nəqliyyatda yaranan problemlərlə bağlı şikayətlərini Azərbaycan Yerüstü Nəqliyyat Agentliyinin Gəncə Regional Bölməsinin (022) 257 76 85 mobil nömrəli “qaynar xətt”inə bildirmələrini tövsiyə edib.
İstər-istəməz ortaya sual çıxır: bu cür müraciətlər vətəndaşların hər gün üzləşdiyi problemi həll edəcəkmi? Sadəcə bir nömrəyə zəng edib şikayət etməklə real dəyişikliklərə ümid etmək olarmı?
Bu sualın cavabı təəssüf ki, ürəkaçan deyil. Gəncədə ictimai nəqliyyatla bağlı problem şikayət toplamaqla həll edilməyəcək dərin sistemli böhrandır. İllərdir yaranan nəqliyyat qıtlığı, keyfiyyətsizliyi və müntəzəm olaraq sıradan çıxması bir marşrut üzrə bir neçə yeni avtobusdan qat-qat ciddi tədbirlər tələb edir.
Sakinlərə vəziyyəti dəyişmək üçün real yol təklif etmək əvəzinə - istər avtobusların sayını və keyfiyyətini artırmaq, istərsə də yeni marşrut sxemlərini hazırlamaq - yerli icra orqanı standart bürokratik cavabla məhdudlaşır.
Cavid Şəmiyev
