Gəncədə bəzi avtobus sürücüləri qınaq obyektinə çevriləcək bütün mümkün hərəkətləri davam etdirməkdədirlər.
Gencexeber.az-a daxil olan şikayətdə bildirilib ki, 6 saylı avtobusun sürücüsü sükan arxasında telefonla danışıb. Həmçinin nəqliyyat vasitəsinin salonunda olan sərnişinlərin arasında uşaq, qoca və hamilə qadının olmasına baxmayaraq davamlı siqaret çəkib.
“Bəzi sürücülər yaşlı, bəziləri gəncdirlər. Adam söz deməyə də utanır. Telefon elə bil əllərinə yapışıb. Qəza ola bilər axı.
Məktəbə uşaq aparırıq, ətrafdakılarda elə təsəvvür yaranır ki, altı yaşlı övladım siqaret çəkir. Nə qədər demək olar avtobusun içində bunu etməyin” – sakin bildirib.
Şikayətçilər bu cür problemləri Gəncədə sərnişindaşıma fəaliyyətinin vahid sistem üzərində qurulmamasında görürlər. Onlar qeyd edirlər ki, şəhərin bu fəaliyyət sektoruna yüksək standartların tətbiqi artıq zəruridir. Müxtəlif şirkətlər isə yeni “çərçivələr” daxilində işləməlidirlər.
