Gəncənin Sadıllı qəsəbəsində kanalizasiya ilə bağlı fövqəladə vəziyyət yaranıb.
Gencexeber.az məlumat verir ki, Yeni Gəncə qəsəbəsindən Samux rayonuna gedən kanalizasiya kanalının çirkab suları yaşayış evini basıb.
Çirkab suların nəqli üçün nəzərdə tutulan kanal Sadıllı qəsəbəsinin Rəmzi Veysəlov küçəsindən keçən hissəsində tıxanıb. Məcradan çıxan çirkab suları həmin ərazidə yerləşən Zaur Qurbanova məxsus evin həyətinə daxil olaraq tikilinin zirzəmisinə yığılıb.
Z.Qurbanovun sözlərinə görə, iyrənc qoxu ilə müşayiət olunan sözügedən hadisə ayda 2-3 dəfə baş verir:
“Bu vəziyyət mütəmadi olaraq təkrarlandığı üçün zirzəmidən suyun çəkilməsi üçün ayrıca su mühərrikindən istifadə edirəm. Belə şey olar? Kanal qazılanda niyə çirkab sularının həcmi nəzərə alınmayıb? Niyə üstü qapadılmayıb ki, zibil kanala töküləndə tıxanmasın?”.
Görünən odur ki, aidiyyəti orqanlar Gəncədə sanitar vəziyyəti təhlükə altına qoyan, həmçinin normal yaşayış şəraitini pozan problemi həll etməyə tələsmir.
Qeyd edək ki, oxşar hadisə şəhərin İsmət Qayıbov küçəsində də tez-tez qeydə alınır.
