Gəncədə maarifləndirici tədbir keçirilib. Bu haqda 22 dekabr tarixində İcra Hakimiyyətinə istinadən məlumat veririk.
“İntihar – çıxış yolu deyil!” adlı tədbir İcra Hakimiyyəti və Nizami bələdiyyəsinin birgə təşkilatçılığı ilə Azərbaycan Dövlət Aqrar Universitetində baş tutub. Burada Nizami bələdiyyəsinin sədri Qoşqar Məmmədov, ADAU-nun prorektoru Aidə Qasımova, icra başçısı Aparatının Gender zorakılığı və uşaqlara qarşı zorakılıq üzrə monitorinq qrupunun, həmçinin Nizami bələdiyyəsinin Gender Əsaslı Komissiyasının üzvləri, Gəncə-Daşkəsən Regional Təhsil İdarəsinin, Gəncə Uşaq Evinin, Baş Polis İdarəsinin nümayəndələri və tələbələr iştirak ediblər.
Tədbirdə “İntihar, onun səbəbləri və nəticələri”, “Stres, stresin səbəbi və ondan çıxış yolları”, “Problem həlletmə üsulları”, “Uşaq və yeniyetmələrə yönəlmiş zorakılığın növləri və həlli yolları” və digər mövzular ətrafında gənclərlə söhbətlər aparılıb.
Məqsəd gənclərə problem həlletmə bacarıqlarının aşılanması və onlarda sağlam düşüncə tərzinin formalaşdırılması olub.
Sonda İcra Hakimiyyətinə Nizami bələdiyyəsi tərəfindən “Təşəkkürnamə” təqdim edilib.
