AMEA Gəncə Bölməsində konfrans keçirilib. Bu haqda 27 dekabr tarixində İcra Hakimiyyətinə istinadən məlumat veririk.
İcra Hakimiyyətinin dəstəyi, Azərbaycan Milli Elmlər Akademiyasının Gəncə Bölməsinin təşkilatçılığı ilə “Gəncə tarixinin aktual problemləri” mövzusunda elmi-praktik konfrans baş tutub. Burada icra başçısı Niyazi Bayramov, AMEA-nın Gəncə Bölməsinin sədri, akademik Fuad Əliyev, İcra Hakimiyyəti başçısı Aparatının məsul əməkdaşları, tarixçilər, alimlər və ali təhsil ocaqlarını təmsil edən tədqiqatçılar iştirak ediblər.
Niyazi Bayramov Gəncə şəhərinin çoxəsrlik və zəngin tarixə malik olduğunu bildirib. Fuad Əliyev konfransın məqsədi və əhəmiyyəti barədə tədbir iştirakçılarına məlumat verib. Bildirib ki, elmi-praktik konfransa Bakı, Gəncə, Şəki və Lənkəran şəhərlərindən olan elm və ali təhsil ocaqlarını təmsil edən tədqiqatçılar qatılıblar. O, konfransın “Gəncə şəhəri qədim və orta əsrlər dövründə”, “Dövlətçilik tariximizdə Gəncə şəhərinin əhəmiyyəti” və “Müasir dövrdə Gəncə şəhərinin inkişafı” mövzularına aid 3 bölmə üzrə aparılacağını qeyd edib.
Tədbirdə ümumilikdə 76 məruzə təqdim edilib, elmi komissiyanın qərarına əsasən, bu məruzələrdən 38-i seçilərək proqrama daxil edilib və mövzular ətrafında müzakirələr aparılıb.
Qeyd edək ki, elmi-praktik konfrans iki gün davam edəcək.
