Gəncədə özbaşına həyət evlərinin önündə yaradılan süni maneə sakinlərin narazılığına səbəb olub.
Gencexeber.az məlumat verir ki, sözügedən hal Eldar Talıbov küçəsində müşahidə edilir. Sürücü tərəfindən daxil olan şikayətdə bildirilir ki, Gülüstan qəsəbəsində yerləşən Mikayıl Müşfiq adına 14 nömrəli məktəbin yaxınlığındakı avtomobil yolunun üzərinə bir-birindən 20-30 metr məsafədə iki yerdə mişar daşları düzülüb. Bu səbəbdən ərazidən keçən nəqliyyat vasitələrinin hərəkət zolağı xeyli daraldılıb.
“Bilirik ki, “tramplin” hər hansı icazədən sonra qoyula bilər. Ancaq yaşadığım ərazidə bu “tramplin” lazımi icazə olmadan yolda hərəkəti məhdudlaşdırıb.
Yolun yarı hissəsinə mişar daşları düzülüb, digər hissədə isə “tramplin” var ki, sürücülər onun üzərindən hərəkət etsin. Yolların yararsız olmağı bir dərddir, belə süni mane isə maşınları lap bərbad vəziyyətə salır”, - deyə şikayətçi sürücü “tramplin”lərin sökülməsini istəyib.
