Gəncədə “Abad məhəllə”lərin salınmasına dair işlərə başlanılıb. Bu haqda 9 dekabr tarixində Gencexeber.az şəhər İcra Hakimiyyətinə istinadən xəbər verir.
Hazırda şəhərin Gülüstan yaşayış massivində abadlıq işləri aparılır. Yaşayış binalarının həyətlərində ağır texnikalar vasitəsilə səliqə-səhman yaradılır, yeni səki daşları quraşdırılır. Burada işıq dirəkləri quraşdırılacaq, asfalt örtüyü salınacaq. Həmçinin ərazi yaşıllaşdırılaraq, dekorativ ağaclar və gül kolları əkiləcək.
Daha sonra sakinlərin istirahəti üçün də müvafiq şərait yaradılacaq. Məhəllələrdə söhbətgahlar, oturacaqlar, böyüklər üçün idman qurğuları yerləşdiriləcək, uşaq meydançaları düzəldiləcək, məişət tullantılarının atılması üçün yeni konteynerlər düzüləcək.
“Abad məhəllə” layihəsi çərçivəsində analoji işlər mərhələli şəkildə Gəncənin bütün ərazilərində həyata keçiriləcək.
