Gəncədə “Gənc xilasedici və yanğınsöndürən” ümumrespublika yarışlarının zona birinciliyi baş tutub. Bu haqda 17 may tarixində Apa-ya istinadən xəbər veririk.
Yarış Fövqəladə Hallar Nazirliyinin təşkilatçılığı, Elm və Təhsil, eləcə də Gənclər və İdman nazirliklərinin dəstəyi ilə olub. Birincilikdə əsas məqsəd şagirdlərin fövqəladə hallara hazırlıqla bağlı fiziki və intellektual səviyyəsinin yoxlanılması, məktəblilərdə fərdi və ictimai təhlükəsizliyə məsuliyyətli yanaşma hissinin artırılması və gənc nəslin nümayəndələrinə sağlam həyat tərzinin aşılanmasıdır.
Yarış “Kombinə edilmiş yanğın estafeti”, “Komandaların təqdimatı” və “Gənc ekspertlər” adlı üç mərhələdən ibarət olub. Yarışların yekunlarına əsasən, Gəncə şəhəri Mikayıl Müşviq adına 14 nömrəli tam orta məktəbin komandası I yerə, Şəmkir rayonu Şiştəpə kənd Qalib Allahverdiyev adına tam orta məktəbin komandası II yerə, Göygöl rayon Üçtəpə kənd Ərşad Məmmədov adına tam orta məktəbin komandası isə III yerə layiq görülüb.
Qalib komanda “Gənc xilasedici və yanğınsöndürən” yarışlarının respublika birinciliyində iştirak etmək hüququ qazanıb.
