Azərbaycan Respublikasının gənclər və idman naziri Fərid Qayıbov 28 sentyabr – 8 oktyabr tarixlərində Azərbaycanda keçiriləcək III MDB Oyunları barədə ətraflı məlumat verib.
Gencexeber.az məlumat verir ki, CBC Sport telekanalının qonağı olan nazir bildirib ki, III MDB Oyunları ölkəmizin 7 şəhərində təşkil olunacaq.
“Açılış və bağlanış mərasimləri isə yeni tikilmiş Gəncə şəhər stadionunda keçiriləcək. Gəncənin bu cür bir stadionuna ehtiyacı var idi və ölkə başçısının qərarı ilə şəhərdə müasir stadion inşa edilir. Düşünürəm ki, bu stadion ölkənin ən yaxşı futbol arenası olacaq və şəhərin simvollarından birinə çevrilə bilər”, - deyə Fərid Qayıbov qeyd edib.
Nazirin sözlərinə görə, hazırda Gəncə Olimpiya İdman Kompleksində təmir işləri tamamlanmaq üzrədir: “Gəncədə Qafqazın ən böyük idman kompleksi inşa edilib – Gəncə İdman Sarayı. Bu qurğuda dörd müxtəlif idman növü üzrə yarışlar təşkil olunacaq. Gəncə Olimpiya İdman Kompleksində isə güləş yarışları baş tutacaq. Hazırda bu kompleksdə təmir işləri aparılır. Gəncə Şəhər İcra Hakimiyyətinin qarşısında 3×3 basketbol yarışları üçün meydança qurulacaq”.
