Gəncə-Daşkəsən Regional Təhsil İdarəsinin müdiri Elçin Kərimov taekvondo üzrə Avropa çempionu adına layiq görülən Göygöl şəhər 6 nömrəli tam orta məktəbin 3-cü sinif şagirdi Dərya Hüseyinova ilə görüşüb.
Gencexeber.az məlumat verir ki, bu barədə regional idarə məlumat yayıb.
Görüşdə Azərbaycan Təhsil İşçiləri Azad Həmkarlar İttifaqı Gəncə şəhər komitəsinin sədri Bayram Hacıyev və Dərya Hüseyinovanın anası da iştirak edib.
Elçin Kərimov Dəryanı təbrik edərək hər zaman dövlətimiz tərəfindən diqqət mərkəzində olduğunu bildirib. İdarə müdiri, həmçinin şagirdi doğum günü münasibətilə də təbrik edib, ona uğurlar arzulayıb.
Sonda Avropa çempionu olmuş məktəbli idarə rəhbəri tərəfindən təşəkkürnamə və hədiyyə ilə təltif olunub.
Qeyd edək ki, Göygöl rayon 6 nömrəli tam orta məktəbin 3-cü sinif şagirdi Dərya Hüseyinova 9-10 noyabr 2024-cü il tarixində Albaniyanın paytaxtı Tirana şəhərində keçirilən Avropa çempionatında taekvondo üzrə bütün rəqiblərini məğlub edərək uşaqlar arasında 24 kq çəki dərəcəsində Avropa çempionu adını qazanıb. Dərya Hüseyinova 44 günlük Vətən müharibəsi şəhidi Elbrus Hüseyinovun övladıdır.
