Gəncədə doğru park edilməmiş avtomobil sürücülərə təhlükə yaradıb. Bu haqda 10 may tarixində Avtosfer-ə istinadən məlumat veririk.
Hadisə bir neçə gün öncə günorta radələrində 3 nömrəli şəhər poliklinikasının önündə qeydə alınıb. “Opel” markalı avtomobilin sürücüsü əl əyləcini çəkmədən maşından düşüb. Bu vaxt nəqliyyat vasitəsi öz-özünə hərəkət etməyə başlayır. Avtomobil yola çıxaraq, dairəyə yanlış girir.
Sürücülərin avtomobilə yol verməsi isə sosial şəbəkə istifadəçilərinin marağına səbəb olub. Şahidlərin sözlərinə görə, maşın bir müddət sonra saxlanılıb. Bildirilir ki, hərəkət iştirakçılarına təhlükə yaransa da, qəza baş verməyib.
Qanunvericiliyə əsasən, sürücü nəqliyyat vasitəsini duracağa qoyduqda mühərriki söndürməli, duracaq tormoz sistemini qoşmalı, təkərləri səkiyə və ya yolun qırağındakı başqa maneəyə tərəf çevirməli və qapıları kilidləməlidir.
