Gəncədə gənclərin İnkişaf və Karyera Mərkəzi tərəfindən paytaxt və regionda yaşayan gənclər üçün “CareerLAB” şəbəkəsi həyata keçirilir. Bu haqda Gencexeber.az-a 29 may tarixində məlumat daxil olub.
“CareerLAB” şəbəkəsinin budəfəki panel müzakirəsi təhsil müəssisələrində ekologiya sahəsi üzrə təhsil alan və bu sahəyə marağı olan gənclər üçün təşkil olunub. Azərbaycan Dövlət Aqrar Universitetində keçirilən panel müzakirədə ümumilikdə 100-dən çox gənc iştirak edib. Tədbirin açılış hissəsində Azərbaycan Dövlət Aqrar Universitetinin Tərbiyə işləri üzrə prorektoru Aida Qasımova iştirakçıları salamlayıb və gənclər üçün keçirilən layihənin vacibliyini vurğulayıb.
Tədbirdə GİKM-in regional nümayəndəliyinin layihələr üzrə mütəxəssisi Miraqil Cavadovun moderatorluğu ilə keçirilən panel müzakirələrin spikerləri: Millət vəkili Müşfiq Cəfərov, Göygöl Milli Parkının direktoru Fuad Quliyev və Azərbaycan Dövlət Aqrar Universitetinin Ekologiya kafedrasının müdiri dosent Musa Bayramov çıxış ediblər. Daha sonra gənclərin sualları cavablandırılıb. Layihənin məqsədi gənclərin təhsil aldıqları ixtisas barədə məlumatlılığının artırılması, gənclərin karyera planlamasına dəstək göstərilməsi və onların şəbəkələşməsini təmin etməkdir.
Qeyd edək ki, Azərbaycan Tələbə Gənclər Təşkilatları İttifaqı və üzv təşkilatları, həmçinin ali təhsil müəssisələrinin karyera mərkəzləri “CareerLAB” şəbəkəsinin tərəfdaşlarıdır.
