Gəncə şəhərinin Cavad xan (Avtozavod) qəsəbəsində yerləşən zibil poliqonunun sahibsiz heyvanların və donuzların məskəninə çevrildiyi barədə yayılan xəbərlərlə bağlı şəhər Mənzil Kommunal Təsərrüfatı İstehsalat Birliyindən (MKTİB) münasibət bildirilib.
Gencexeber.az-a qurum tərəfindən verilən açıqlamada qeyd olunur ki, yayılan iddialar “əsassız və böhtan xarakterlidir”. Bildirilib ki, sözügedən görüntülər bir neçə il əvvələ aid ola bilər və hazırda poliqonda belə hallar müşahidə olunmur:
“Gəncə şəhər Mənzil Kommunal Təsərrüfatı İstehsalat Birliyinin balansında olan poliqonda artıq bir neçə ildir ki, belə hallar yaşanmır. Belə ki, əvvəllər poliqona icazəsiz daxil olaraq ev heyvanlarını orada qidalandırmağa cəhd göstərən Cavad Xan qəsəbə sakinləri artıq bundan məhrum edilib. Belə ki, zibil poliqonunun mühafizə zolağı müəyyən edilərək nəzarətə götürülüb və kənar şəxsin əraziyə daxil olması qadağan edilib.” - Qurumun açıqlamasında bildirilib.
MKTİB həmçinin küçə heyvanlarının poliqona atılması ilə bağlı ittihamları da əsassız sayıb. Qurumun fikrincə, bu, “ictimai əsaslarla fəaliyyət göstərməli olan “Yuva” sığınacağının ünvanını belə bilməyən dırnaqarası heyvansevərlərin uydurma xəbəridir”.
Açıqlamada media orqanlarından qurumun balansında olan ərazilər haqqında bu kimi xəbərlər tirajlayarkən MKTİB ilə informasiyanın dəqiqləşdirilməsi rica olunub.
Qeyd edək ki, Gencexeber.az redaksiyasına daxil olan videogörüntülərin ötən ayın 27-si poliqonda çəkildiyinə dair ekran görüntüləri şikayətçilər tərəfindən təqdim olunub. Onlar görüntülərin məhz 2025-ci ilin 27 may tarixində qeydə alındığını iddia edirlər.
