Göygöl rayonunun Toğanalı kəndi ərazisində Kürəkçay çayının məcrası və sahili çirkləndirilir.
Gencexeber.az-ın məlumatına görə, çayın restoranlar və digər istirahət obyektlərinin yerləşdiyi hissəsində ciddi tullantı problemi yaranıb. Təbiət qoynunda yerləşən bu istirahət zonasında məişət tullantılarının çaya və ətraf sahilboyu ərazilərə atılması ekoloji vəziyyəti pisləşdirib.
Ərazidə müşahidə olunan natəmizlik istirahətə gələnlərin narazılığına səbəb olub. Yerli sakinlər və təbiətsevərlər aidiyyəti qurumların məsələyə müdaxilə edərək sahilboyu ərazilərin təmizlənməsini və nəzarətin gücləndirilməsini təmin etməsini tələb edirlər.
Qeyd edək ki, Kürəkçay rayon üçün mühüm su hövzələrindən biri hesab olunur və onun mühafizəsi ekoloji baxımdan xüsusi əhəmiyyət daşıyır.
