Bu gün şəhid Yalçın Şükürovun və Elvin Mustafayevin doğum günüdür.
Yalçın Şükürov 1972-ci il avqustun 7-də Gəncə şəhərində anadan olub. İlk öncə 24 saylı orta məktəbdə, sonra isə 37 saylı texniki-peşə məktəbində oxuyub. Bir müddət Alüminium zavodunda çilingər işləyib. Uşaqlıqdan idmanla məşğul olub.
O, 1990-1992-ci illərdə Saratov şəhərində həqiqi hərbi xidmətdə olub. Yalçın könüllü olaraq, özünümüdafiə batalyonuna yazılıb. Ağdərə uğrunda gedən döyüşlərdə fəal iştirak edib.
Yalçın Şükürov beş nəfər döyüşçü ilə düşmən mövqelərini müəyyənləşdirmək üçün kəşfiyyata çıxarkən qəfildən mühasirəyə düşüb. O, 1992-ci il iyulun 3-də şəhidlik zirvəsinə ucalıb. Gəncə şəhərinin Şəhidlər xiyabanında dəfn olunub.
Elvin Fuad oğlu Mustafayev 7 avqust 1997-ci ildə Gəncə şəhərində anadan olub. 2014-cü ildə 42 nömrəli tam orta məktəbi bitirib.
2015-ci ildə hərbi xidmətə çağırılıb, Müdafiə Nazirliyinin “N” saylı hərbi hissəsində xidmət edib.
2017-ci ildən Rusiya Federasiyasında ticarətlə məşğul olub.
Vətən müharibəsi zamanı o, yenidən ordu sıralarına cəlb olunub. Füzuli, Cəbrayıl və Xocavənd rayonları istiqamətində gedən döyüşlərdə iştirak edib.
Elvin Fuad oğlu Mustafayev 30 oktyabr 2020-ci il tarixində Füzuli, Cəbrayıl və Xocavənd rayonlarının azadlığı uğrunda gedən döyüşlərdə şəhidlik zirvəsinə ucalıb.
28 aprel 2021-ci il tarixində Gəncə şəhərinin Şəhidlər xiyabanında dəfn olunub.
