Bu gün şəhidlər Bəxtiyar Rüstəmov və Ceyhun Məmmədovun doğum günüdür.
Rüstəmov Bəxtiyar Hüseyn oğlu 5 yanvar 1967-ci ildə Qərbi Azərbaycanın Quqah rayonunun Kilsə kəndində anadan olub. 1984-cü ildə Kilsə kənd orta məktəbini bitirib.
Ukrayna Respublikasında 2 il hərbi xidmət keçdikdən sonra yaşadığı kəndə qayıdıb. Bəxtiyar Rüstəmov Gəncə şəhərində yerləşən Gil-Torpaq İstehsalat Birliyində qaynaqçı vəzifəsində çalışıb.
7 noyabr 1993-cü il tarixində Kəpəz Rayon Hərbi Komissarlığı tərəfindən hərbi xidmətə çağırılıb. O, 703 saylı hərbi hissənin tərkibində bir sıra kəndlərin müdafiəsində iştirak edib. Rüstəmov Bəxtiyar Hüseyn oğlu 28 yanvar 1994-cü ildə Ağdərə kəndi uğrunda gedən qızğın döyüşlərin birində şəhidlik zirvəsinə ucalıb. O, Gəncə şəhəri Şəhidlər xiyabanında dəfn olunub.
Ceyhun Rafiq oğlu Məmmədov 5 Yanvar 1971-ci ildə Gəncə şəhərində dünyaya göz açıb. Boksla məşğul olan Ceyhun dəfələrlə respublika turnirlərində mükafatlarla təltif olunub.
I Qarabağ müharibəsi zamanı o, könüllü olaraq cəbhəyə yollanıb. 729 saylı hərbi hissənin tərkibində Goranboy-Tərtər bölgəsində vuruşub. Ceyhun Rafiq oğlu Məmmədov 1993-cü ilin 27 aprel tarixində Gülüstan kəndi uğrunda gedən döyüşlərin birində şəhidlik zirvəsinə ucalıb.
