Bu gün şəhid Elxan Xəlilov və Elxan İbrahimovun doğum günüdür.
Xəlilov Elxan Məhərrəm oğlu 2 yanvar 1973-cü ildə Gəncə şəhərində anadan olub. O, 25 saylı orta məktəbin 8-ci sinfini bitirdikdən sonra 27 saylı texniki-peşə məktəbində təhsil alıb.
21 aprel 1992-ci ildə həqiqi hərbi xidmətə yollanıb. Xəlilov Elxan Məhərrəm oğlu 12 oktyabr 1992-ci ildə Sırxavənd uğrunda gedən qızğın döyüşlərdə qəhrəmancasına həlak olub və 15 oktyabrda Gəncə şəhəri Şəhidlər Xiyabanında dəfn edilib.
İbrahimov Elxan Kazım oğlu 2 yanvar 1974-cü ildə Gəncə şəhərində anadan olub. Elxan İbrahimov 1992-ci ildə həqiqi hərbi xidmətə çağırılıb. Elxan İbrahimov Füzuli rayonunda 36 nəfərlə dörd gün mühasirədə qalıb, qızğın atışma nəticəsində mühasirəni yarsa da, yaralanaraq ağır vəziyyətdə Gəncədə yerləşən hərbi hospitalda müalicə olunduqdan sonra yenidən döyüş bölgəsinə yollanıb.
İbrahimov Ballıqaya adlanan ərazidə snayperlə vurularaq şəhidlik zirvəsinə ucalıb. İbrahimov Elxan Kazım oğlunun meyiti bir neçə saat ərzində döyüş gedən ərazidə qalıb. Sonradan azərbaycanlı kəşfiyyatçıların keçirdikləri əməliyyat tədbirləri nəticəsində bölgədən çıxarılaraq Gəncəyə göndərilib. O, 21 aprel 1993-cü ildə Şəhidlər Xiyabanında dəfn edilib.
