Bu gün şəhid İlqar Kərimov, Şahbuz Rəhimov və Aydın Həsənovun doğum günüdür.
Kərimov İlqar Becan oğlu 15 dekabr 1968-ci ildə Gəncədə anadan olub. İbtidai sinifləri 8 saylı orta məktəbdə, 5-8-ci sinifləri isə 38 saylı orta məktəbdə bitirdikdən sonra təhsilini 15 saylı texniki-peşə məktəbində davam etdirərək rəngsazlıq peşəsinə yiyələnib.
1984-1986-cı illərdə Stavropol şəhərində həqiqi hərbi xidmətdə olub. I Qarabağ müharibəsi zamanı, 27 iyun 1993-ildə könüllü olaraq cəbhəyə yollanıb. Seyfəli poliqonunda 2 ay xidmət keçdikdən sonra Ağdam rayonuna göndərilib.
Kərimov İlqar Becan oğlu 2 dekabr 1993-cü ildə Ağdam rayonu uğrunda gedən döyüşdə şəhidlik zirvəsinə ucalıb.
Rəhimov Şahbuz Dursun oğlu 15 dekabr 1974-cü ildə Qərbi Azərbaycanın Amasiya rayonunda anadan olub. 1988-ci ildə ailəsi ilə birlikdə Gəncə şəhərinə gəlib və təhsilini Gəncə şəhər 28 saylı məktəbdə davam etdirib.
1992-ci ildə həqiqi hərbi xidmətə yollanıb. 7 may 1994-cü ildə Füzulinin Kərimbəyli kəndində Rəhimov Şahbuz və yanında olan 8 döyüş yoldaşı şəhidlik zirvəsinə ucalıblar.
Həsənov Aydın Elşən oğlu 15 dekabr 1995-ci ildə Gəncədə anadan olub. 2011-ci ildə Gəncə şəhər 44 nömrəli ingilis dili təmayüllü məktəb-lisey kompleksinin 9-cu sinfini bitirib və təhsilini 2012-2015-ci illərdə 3 nömrəli Peşə liseyində davam etdirib.
2014-cü ildə həqiqi hərbi xidmətə yollanıb. Vətən müharibəsi zamanı yenidən ordu sıralarına çağırılıb. Həsənov Aydın 8 noyabr 2020-ci il tarixində Xankəndi ərazisində gedən döyüşlərdə düşmən gülləsinə tuş gələrək şəhidlik zirvəsinə ucalıb.
