Bu gün şəhid Elbrus Allahverdiyev, Rahib Əliyev və Gündüz Əliyevin doğum günüdür.
Elbrus Hacı oğlu Allahverdiyev 28 sentyabr 1958-ci ildə Gəncədə anadan olub. 18 saylı məktəbdə təhsil alıb. Almaniyada hərbi xidmətdə olub. 1979-cu ildə Orenburq vilayətində praporşik məktəbini bitirib. 1990-cı ildə Orconikidze şəhərində Kənd Təsərrüfatı İnstitutunun məzunu olub.
O, könüllü olaraq cəbhəyə gedib. Milli ordumuzda ilk topçulardan biri olub. 1992-ci ilin sentyabrında Avdur kəndində düşmənin bir topunu və iri çaplı pulemyotunu, Ağdərədə isə bir reaktiv qurğusunu, xeyli maşın və texnikasını məhv edib. Daha sonra Çıldıran uğrunda gedən döyüşlərdə vuruşub.
Leytenant Elbrus Hacı oğlu Allahverdiyev 16 iyun iyun 1993-cü ildə döyüşlərin birində şəhidlik zirvəsinə ucalıb. 16 sentyabr 1994-cü ildə ona Milli Qəhrəman adı verilib.
Rahib Zirəddin oğlu Əliyev 28 sentyabr 1967-ci ildə Gəncədə anadan olub.
1992-ci ildə könüllü olaraq cəbhəyə yollanıb. Burada sıravi atıcı idi. Ağdərədəki hərbi əməliyyatlarda böyük şücaət göstərib.
Rahib Zirəddin oğlu Əliyev 10 fevral 1993-cü ildə şəhidlik zirvəsinə ucalıb. Şəhidimiz Gəncə Şəhidlər xiyabanında dəfn olunub.
Gündüz İdris oğlu Əliyev 28 sentyabr 1969-cu ildə Göygöldə anadan olub. Ailəsi Göyçə mahalının Zod kəndinə köçüb. Daha sonra - 1988-ci ildə Gəncəyə gəliblər.
O, 1987-ci ildə həqiqi hərbi xidmətə çağırılıb. Kiyev şəhərində qulluq edib. 22 iyul 1993-cü ildə Vətənin müdafiəsinə qatılıb. Bir sıra qızğın döyüşlərdə erməni silahlı qüvvələrinə ciddi zərbələr endirib.
Gündüz İdris oğlu Əliyev 12 fevral 1994-cü ildə Kəlbəcər uğrunda gedən qızğın döyüşlərdə şəhidlik zirvəsinə ucalib. Şəhidimiz Gəncə şəhərinin Şəhidlər xiyabanında dəfn olunub.
