Azərbaycan Milli Elmlər Akademiyasının Gəncə bölməsində toplantı olub. Bu haqda 3 may tarixində Kəpəz televiziyasına istinadən xəbər veririk.
“Boyaq bitki xammalları və tullantılarının emalı” mövzusuna həsr olunan Respublika elmi konfransı öz işinə başlayıb. Tədbir Azərbaycan Milli Elmlər Akademiyasının Gəncə bölməsində təşkil edilib. Burada ekoloji bitki boyaları, qida təhlükəsizliyində boyaq bitkilərinin əhəmiyyəti, biomüxtəliflik və onun qorunması, bitki mənşəli tullantıların təkrar emalı və tətbiqi mövzularında məruzələr dinlənilib.
Konfransda kənd təsərrüfatında biomüxtəlifliyin zənginləşdirilməsi və məhsuldarlığın yüksəldilməsi üçün növbəli əkinlər sisteminin tətbiqindən danışılıb. Daha sonra təkrar emal texnologiyalarının ekoiqtisadi nəticələri müzakirə edilib və qərb regionunun yay otlaqlarının biomüxtəlifliyinin tədqiqi barədə məlumat verilib. “Yaşıl dünya naminə həmrəylik ili”nə həsr olunmuş konfrans sabah yekunlaşacaq.
