Gəncədə ödənişsiz ingilis dili proqramının açılış mərasimi keçirilib. Bu haqda 14 dekabr tarixində Azərtac-a istinadən məlumat veririk.
“Aztəminatlı İcmalar üçün ingilis dili” proqramına start verilib. Açılış mərasimində ABŞ səfirliyinin müvəqqəti işlər vəkili Hüqo A.Qevara və məktəblilər iştirak ediblər. Proqram 12, 14, 26, 32, 34 və 43 saylı orta məktəblərin 50 şagirdi üçün nəzərdə tutulub. Qevara ingilis dilinin gənclərə təhsil və karyera imkanları yaratmaqla yanaşı, Azərbaycan və ABŞ arasında körpülərin qurulmasındakı rolunu da vurğulayıb.
Dərslərə ABŞ hökuməti mübadilə proqramlarının ixtisaslı məzunlarından ibarət komanda rəhbərlik edir. Məşğələlər 2023-cü ilin iyun ayına kimi keçiriləcək.
Qeyd edək ki, son 4 ildə ABŞ Səfirliyi tərəfindən Azərbaycanın bir sıra regionlarında 500-ə yaxın şəxsin ingilis dili bilikləri təkmilləşdirilib.
